لاننا عارفين اهمية البلكونة و تأثيرها علي الصحة النفسية للانسان و كمان عارفين ان اغلبنا بقي معندوش ثقافة انه يقعد في البلكونة عشان يستمتع بالطبيعة مع انها فراغ معماري مهم و موجود في كل بيت, عشان كدة انهارده جبنالك افكار كتير ممكن تعمليها في بلكونة بيتك عشان ترجعلها جمالها و حيويتها و تخلقلك مساحة خاصة مع الطبيعة تقدري تفصلي فيها شوية و تستمتعي بالسكون و الهدوء
استخدمي النجيلة الصناعي
لو استخدمتي النجيلة الصناعي في الارضية و غطتيها كلها بيها هتحسي بتغيير كبير بعنصر بسيط و مش غالي, بس احساسك بالمكان كله هيتغير و احساس النجيلة في الارض هيزود احساسك و ارتباطك بالطبيعة و يساعدك علي تقليل التوتر
ممكن كمان تتركب عالحيطه بسهولة هي مصممه انا تتثبت بلزق خاص و ده بيكون متوفر في كل الاماكن اللي بتبيعها. و تقدري كده تغيري ديكور البلكونة بعنصر واحد بسيط جدا بس يديكي احساس جميل و مريح و يعلي من طاقة المكان الايجابية
البلاطات الخشبية
البلاطات دي متوفرة في اماكن كتير و في منها انواع كتير و بتتركب بمنتهي السهولة و مش محتاجة حد متخصص, بتديكي احساس دافي بالمكان و بردو بترفع من قيمة البلكونة و استخدمها مريح, و ممكن تطعميها بالظلط الصغير المخصص لاعمال الاندسكيب و بردو متوفرة في محلات كتير و سعرها معقول
و ممكن تدخلي معاها النجيلة الصناعي و الظلط الصغير و تعملي التصميم اللي تحبيه
أعواد البامبو و غصون الشجر المجفف
البامبو فيه اشكال و مقاسات كتير مش بس في الطول انما كمان في التخانات, و ده من العناصر اللي بتدينا مرونة عالية في استخدامه في اعمال الاندسكيب, و من اهمها لو عايزين نخلق خصوصية في المكان, فلو عايزة تفصلي بينك و بين جيرانك لو مفيش حيطة فاصلة ممكن تعملي فاصل بامبو زي كده
و ممكن يتثبت في بوت زرع كبير و يتحط فيه اضائة بتدي احساس دافي بليل للمكان
ممكن كمان يتحط علي سور البلكونة لو هو حديد مفرغ عشان يدي شكل حلو من برا و من جوة و كمان يعلي من احساسك بالخصوصية في البلكونة
و كمان ممكن تزرعيه و يزود اللون الاخضر اللي بيعلي من احساسنا بالطاقة الايجابية و يزود السلام النفسي
ده غير انك لو بتحبي تعملي ستايل اسيوي او استوائي البامبو هيديكي مرونة عالية باشكالة المختلفة انك تحققي الستايل ده
أحواض الزرع
طبعا بما اننا بنتكلم عن البلكونات و ارتباطها الاساسي بالطبيعة فا اساسي انك تزيني البلكونة بعناصر نباتية مختلفة عشان تخليها جزء من الطبيعة و تربطك بيها و يساعدك علي تقليل التوتر و الاسترخاء بشكل افضل
ممكن تعملي حوض زرع واحد كبير زي الصورة في حيطة واحدة و تحطي فيها نباتات مختلفة بارتفاعات مختلفة و الوان مختلفة
و ممكن تعلقي بوت صغير بالوان مختلفة عالحيطة و تديكي احساس بالبهجة و السعادة
و لو مش بتحبي الزرع الطبيعي او معندكيش وقت كفاية للاعتناء بيه ممكن نفس الشكل يتحقق بالزرع الصناعي, دلوقتي بقي في نوعيات كتيرة منه و اشكال قريبة جدا و تكاد تكون بتدي نفس احساس الزرع الطبيعي, و ممكن بشيتات الزرع الصناعي الجاهزة تعملي تجليد عالحيطة بالشكل ده
استخدام الخشب مع الزرع بيدي احساس دافي لانها كلها عناصر طبيعية, ممكن تعملي بمقاسات مختلفة بوت تزرعي فيه اعشابك اللي بتحبيها زي النعناع و الريحان و الروز ميري, و يتعلقوا في بارتشن خشب بسيط زي الصورة و ده هيعلي من جمال و اناقة البلكونة بتاعتك
و ممكن بالمكرامية تعملي شكل يتعلق منه البوت بالزرع و يتحط بكذا طريقة زي الصور
أشكال مختلفة من الارفف علي الحائط
حتي لو بلكونتك صغيرة و شباك الخروج منها واخد مساحة الحيطة كلها تقدري علي جمب واحد تعملي افكار كتير و مختلفة من الارفف عشان تستخدميها بطرق كتير مختلفة و تديكي بهجة للمكان
ممكن تعملي ارفف خشب زي الصورة و تتثبت بزوايا حديد و دي متوفرة عند اي محل حدايد و بويات, و ممكن تستعملي الارفف دي في الزرع و ممكن تحطي عليها كتب لو بتحبي القراية
و ممكن ارفف متعلقة بخيوط المكرمية و متجمعه بتعليق من مكان واحد، و تتعمل بالمقاسات اللي تحبيها و كمان ممكن يتفرغ فيها و يتحط فيها بوت الزرع باشكال و احجام مختلفة
ممكن بردو تعلقي ارفف بطريقة سهله و بسيطة جدا و هي شبك الحديد و ده بردو متوفر بمقاسات و احجام مختلفة و ممكن يتدهن باللون اللي تحبيه، بيتعلق بطريقة بسيطة جدا علي مسامير زاوية و يشيل معاكي ارفف بعدد كبير و كمان تغير طريقة تعليق الارفف بتكون سهلة و بسيطة و تقدري تغيري فيها كل شوية عشان تديكي شكل ديكور مختلف
تقدري باي شكل ارفف عندك تعملي وحدات متكررة و تكوني بيها الشكل اللي تحبيه و بينهم تطعمي بزرع سواء طبيعي او صناعي
و لو مش حابة تخرمي في الحيطة و تثبتي عليها ممكن ببوكسات خشب زي كده – و دي متوفرة في محلات كتير و كمان في ايكيا- تعملي اي تشكيل انت حباه و تحطيها فوق بعض و تخلقي مكتبة جميلة ممكن تستغليها انها تكون مكان القراية الهادي و اللطيف ليكي عشان تفصلي بيه عن دوشة الحياة
رف خشب للسور
بوحدة بسيطة زي كدة تقدري تعملي رف خشب لطيف يتعلق علي سور البلكونة و تقدري تستخدميه كا تربيزة صغيرة تحطي عليها القهوة و الفطار بتاعك الصبح عشان تبدئي يومك بنشاط و انبساط
و ممكن تكبري العمق بتاعه و يبقي زي مكتب صغير لو عندك شغل من البيت ممكن تستخدميه كا مكتب و تشتغلي عليه
ستائر
عايزة تزودي من خصوصة البلكونة و مش عارفة؟ فكرة الستائر في البلكونات فكرة قديمة و مظهرها مش احسن حاجة؟ ده حقيقي بس احنا جيبنالك افكار مختلفة هتديكي شكل جميل و كمان تزود من الخصوصة و تخليكي تستخدمي الستائر في البلكونة و انت حابه شكلها
الشكل ده بيتثبت علي حائط الشباك الرئيسي للبلكونة و بيكون في كمرة خشب بالعرض متثبته و الستائر بتعدي من عليها و تبقي لحد ارتفاع السور بس, كمان نوع و لون القماش المستخدم في الستائر هو اللي هيعلي من اناقة المكان, استخدمي قماش كتان لانه بيدي نسبة عالية من الخصوصة و كمان مسامه الوسعة هتدخل هوا بنسبة كبيرة و مش بيحجب الرؤية لمستخدم البلكونة فا يقدر يشوف تفاصيل كتير من غير ما يكون مجروح
بنفس طريقة التثبيت بس بنوع مختلف من الستائر و هي ستائر البامبو بتدي شكل حيوي للمكان و كمان طريقة قفلها و فتحها لانها بتلف لفوق بتكون عملية جدا و سهلة في فتحها و قفلها, و كمان تنظيفها بيكون اسهل و اسرع
دي بقي اجمل اختراع في خلق مساحة لطيفة من الخصوصية, كانها خيمة صغيرة بتعمليها بخامات بسيطة و غير مكلفة و طريقتها سهله جدا و كمان فك و تركيب القماش غاية في السهولة, مش بس عملية و كمان شكلها جميل جدا و بتضيف في المكان روح لطيفة
الفرش
ممكن لو المكان صغير يكون مرهق في اختيار الفرش بتاعه بس هتتفاجئي ان فرش البلكونة الصغيرة فيه افكار كتير سهله و مريحة و كمان مش مكلفة
الكراسي الخشب اللي بتتفتح و تتقفل مع تربيزة خشب صغيرة ممكن تبقي اكتر حاجة عملية و مش مكلفة, كمان هتلاقيهم في محلات كتير جدا و لو بلكونتك رفيعة و طويلة و حبيتي فكرة الرف الخشب ممكن تجيبي كراسي بار زي الصورة
ممكن تعملي وحدة تخزين بسيطة زي كده و تبقي بتتفتح من فوق او فيها ادراج و عليها شلت متحركة للجلوس, ده مش بس حل عملي و هيوفرلك مساحة تخزين لبيتك لاء و كمان هتقدري تخزني فيه الشلت المتحركة للجلسة و الظهر بشكل يحافظ عليها من المطرة و الشمس
لاننا كلنا بقينا مهتمين بالبيئة و عارفين قد ايه اي اختلال في البيئة بياثر علينا و علي درجات الحرارة فا استخدام البلتات الخشب و اعادة تدويرها في الاثاث مش بس بقي ليه مساحته الكبيرة في السوق من عرض و طلب, كمان سهولة استخدامها و التعامل معاها بقي عامل كبير لاقبال المستخدمين, عشان كل ده انت تقدري في يوم واحد تعملي فرش للبلكونة بتاعتك من بلتات الخشب القديمة و تكونلك احلي قاعدة في البلكونة
لو بتحبي البساطة و الاناقة في نفس الوقت, رف خشب بسيط زي ده بتثبيته عالحيطة هيعملك احلي جلسة بسيطة للبلكونة و ممكن تزودي شلت للظهر زي شلت الجلوس عشان تضمني اريح قاعدة ممكنة, و كرسي معلق بامبو زي الصورة هيديكي شكل جميل و كمان وقت لطيف تقضيه عليه عشان يقلل من توتر يومك
علقي مرجيحة, علقي مرجيحة, علقي مرجيحة و خلي الطفلة اللي جواكي تنبسط, و المراجيح المكرامية فيها اشكال كتير جدا و كمان الوان و ممكن تبقي مرجيحة بامبو او حتي راتان, علقي مرجيحة ايا كانت خامتها و انبسطي
الأضاءة
اخر عنصر معانا في المقال ده و هو من اهم عناصر التصميم و الديكور في اي فراغ هو الاضاءة, اه البلكونة فيها اضاءة طبيعية بس هتحتاجي تعملي فيها اضائات جمالية عشان تديكي موود هادي و مريح لما تحبي تقعدي فيها بليل
ممكن تعلقي وحدة زي دي كمصدر اضاءة اساسية في البلكونة, لان خاماتها كلها طبيعية زي الخشب اللي فيها و الحديد اللي بيكون اساسي في التعليق فهي هتبقي اختيار ممتاز عشان تقاوم عوامل الطبيعة من مطرة و رطوبة و هوا و حرارة, كمان اضافة الزرع الصناعي فيها هيديها شكل تاني خالص و يربطها اكتر بشكل البلكونة بتاعك
لو اختارتي تطعمي الارضية بحبات الظلط ممكن تحطي فيه وحدات اضاءة صغيرة تدي موود هادي و لطيف لما تشغليها و دي متوفر منها اشكال كتير و انواع كتير و مش كلها بيحتاج تاسيس كهربا ليها في الارضية في منها بيشتغل بالبطاريات
ستائر البي لايت من اكتر عناصر الاضاءة اللي بتدي دفئ للمكان و بتزود احساس الألفة فيه, مش بس كده كمان نورها الهادي هيساعدك تتخلصي من الطاقة السلبية و تستعيدي هدوئك الداخلي
وحدات الاضاة من البامبو فيها اشكال و احجام كتير و مختلفة, عشان كمان خامتها الطبيعية هتبقي اختيار مناسب يليق مع بلكونتك و الديكور الطبيعي اللي هتحبي تخلقيه فيها
لو عملتي ارفف ممكن تعملي من وراها اضاءة خفيفة بشرايط اضاءة الليد و هتديكي جو هادي و لطيف و دافي
و لو حابة تعملي حاجة مطرقعة بس جميلة ممكن تزودي كتابة نيون علي الحيطة او لو عملتي الزرع الصناعي علي الحيطة ممكن يتحط معاه بيدي شكل مودرن و لطيف
مش عايزة بحيرة صغيرة؟
دي اخر فكرة معانا انهاردة و لو انت بتحبي عنصر الماية في الطبيعة زي البحيرات و النوافير ممكن تعملي بحيرة صغنونة و كمان تحطي فيها سمك – لو بتحبي تربية الاسماك – و كمان فيها اشكال كتير متوفرة في محلات كتير و ممكن يبقي فيها شلال و مابتحتاجش اكتر من فيشة كهربا
و ممكن باي خامات بسيطة انت تعمليها بنفسك و تمليها ماية و تملاكي سعادة
نتمني الافكار اللي قولناها انهارده تساعدك تخلقي في بلكونتك مساحة هادية و لطيفة ليكي تستمتعي فيها بوقتك و تهدي فيها اعصابك و تلاقي هدوئك و سكينتك
قولولنا حابين نتكلم معاكوا في ايه تاني و ايه في البيت بيحيركوا و محتاجين ليه حلول عملية و مريحة