بتفرشي بيتك الجديد و مش عارفة تبدأي منين؟ بتشوفي افكار كتير للديكور و الالوان و الخامات و مش عارفة تختاري بنهم ازاي؟ عايزة تصممي بيتك بنفسك و علي ذوقك بس خايفة الاختيارات مع بعض متبقاش مناسبة؟
في المقال ده و علي مدي المقالات الجاية هنقلك ازاي تفرشي بيتك بنفسك و تختاري بين كل الموديلات و الستيلات و الالوان و حتي الخامات المختلفة بالشكل اللي يناسبك و يناسب ذوقك, هنتكلم ازاي مصممين العمارة الداخلية بيبدأوا و يجمعوا افكارهم و كل اللي بيحتاجوه عشان يصمموا بيت جميل و متناغم و عملي في نفس الوقت
لما بنيجي نصمم بيت جديد – كمصممين عمارة داخلية – اول حاجة بنعملها هي بلان الفرش, اول حاجة بنبدأ بيها ديما و علي غير توقع كل الناس هو بلان فرش و توزيع الاثاث في المسقط الافقي المعماري للفراغ اللي بنصممه
و عشان نبدأ بالهدف ده بيكون في شوية خطوات اساسية و مهمة جدا عشان نوصل لانسب طريقة فرش للاثاث في الفراغ اللي بنعمله تصميم, الخطواط دي بتكون كالتالي
نحدد احتياجاتنا في استخدام الفراغ
بنسئل شوية اسئلة مهمة زي, الفراغ ده هنستخدمة في أيه؟ يعني هيكون أوضة نوم و لا أوضة سفرة و لا غرفة معيشة ….إلخ
مين هيستخدم الفراغ؟ و اعمارهم ايه؟ و ايه احتياجاتهم الشخصية في استخدام الفراغ ده؟
ايه الاحساس اللي عايزين نحسه في الفراغ ده؟ يعني عايزين نحس بالهدوء ولا بالنشاط ولا بالراحة و الاحتواء و الدفئ, او ممكن عايزينه رسمي شوية عشان الضيوف…..إالخ
لما بنحدد احتياجنا في استخدام الفراغ ده بنكون قطعنا شوط كبير في المرحلة دي و بنبدأ نحدد احنا محتاجين نفرش فيه وحدات اثاث ايه و مقساتها ايه حسب احتياجتنا
يعني لو حددنا اننا هنفرش الفراغ ده انه يكون غرفة معيشة, هنبدأ نتخيل احنا محتاجين فيه قطع اثاث عاملة ازاي, يعني مثلا هنختار كنبة 3 افراد و معاها كراسي او بانكت و لا كنبة كورنر و معاها كنبة تانية لفردين؟!, هل محتاجين تربيزة وسط تكون مساحتها كبيرة و لا ممكن تربيزات متداخلة و تكون سهله الحركة؟
أول ما نحدد كل أحتياجتنا بنكتبها و نحصرها عشان مانحترش و احنا بنتفرج علي الاثاث و بنشتريه
ولما بنجاوب علي كل الاسئلة دي بنبقي جاهزين بعد كدة للخطوة التانية و هي
إختيار الستايل
و الستايل – النمط أو الطراز- هو الشكل المتكامل للفراغ اللي بيكون السبب الرئيسي في احساسنا النفسي بالفراغ, و الستايل بيكون سبب رئيسي في تماسك و ترابط تصميم الفراغ و بالتالي يكون مريح للعين و في انسجام بين كل عناصر التصميم
طبعا اختلاف الستايل بيكون ليه علاقة بذوقنا الشخصي و ميولنا في استخدام المكان و ده ملوش علاقة ان في ستايل احلي من التاني, انما كل حد فينا بيكون عنده تفضيل شخصي لستايل معين بيحبه و يرتاح فيه اكتر
لكن الفكرة الاساسية من الستايل و احترام معاييره في اختيارات عناصر التصميم هو الانسجام و الترابط اللي بيكونوا العنصر الخفي لجمال أي مكان بندخله و نرتاح فيه
بعد كده بنعمل حاجتين مهمين, اول حاجة لازم نعمل عملية استلهام للشكل النهائي اللي عايزين نحققه في الفراغ بتاعنا, بكل سهولة هندخل علي بنتريست و نعمل بورد جديدة بأسم الفراغ اللي بنفرشه و نضيف عليها كل الصور اللي هتعجبنا و تناسب كل الاحتياجات الخاصة بينا اللي حددناها في استخدام الفراغ بتاعنا
و بعدين نبص عالبورد دي و لو جمعنا عليها كل الافكار اللي محتاجنها و الشكل اللي عايزينه لقطع الاثاث و الاكسسوارات و الالوان و الخامات و لا لسه هنحتاج ندور علي حاجة تانية
لما بنحدد الستايل بنكون جاهزين للخطوة الأهم و هي
تحديد الميزانية و تقسيمها
دي من أهم الخطوات اللي من غيرها ممكن مانعرفش نتحرك في عملية التصميم و ممكن تخلينا مانعرفش نحدد أولويات الشراء, و أيه مهم اننا نستثمر فيه أكتر وأيه ممكن نوفر فيه و نغيره بشكل دوري, عشان كده مهم جدا نحط ميزانية و نحدد هنقسمها ازاي بين وحدات أثاث اساسية و وحدات ثانوية و وحدات إضاءة و مفروشات و اكسسوارات
دلوقتي أحنا جاهزين أننا نعرف أزاي نحدد وحدات الفرش بتاعنا و اللي بيبدأ معانا في الخطوة الرابعة و هي
طريقة فرش الفراغ و توزيع الاثاث
لأن توزيع الاثاث بيكون هو المفتاح الاساسي اللي بنشتغل عليه بعد كدة في كل التاسيسات زي تاسيس الكهرباء و تاسيس التكييفات و الارضيات و الاسقف, بيكون هو اول حاجة بنشتغل عليها كمصممين عمارة داخلية, و ده لان توزيع الفرش بيتوقف عليه جميع الاشياء اللي بنستخدمها في الفراغ
يعني مثلا لو بنفرش غرفة نوم, فا مكان السرير بيتوقف عليه وضع مخارج الكهرباء الجانبية شمال و يمين السرير, كمان الاضاءة ماينفعش تكون مباشرة فوق السرير لان ده مابيكنش مريح و كمان مش بيساعد علي الاسترخاء, ده غير ان مكان التكييف كمان ماينفعش يبقي في وش السرير لان خروج الهواء بشكل مباشر عالسرير هيكون مزعج جدا لاي حد نايم علي السرير ده
دي كلها امثله بسيطة تبين ليه ديما احنا كا مصممين عمارة داخلية بنبدأ ديما بفرش و توزيع الاثاث كخطوة اولى في عملية التصميم
كمان من الاسباب المهمة اننا بتوزيع الاثاث بنحدد مسارات الحركة في الفراغ, يعني لازم ندرس كويس في الفراغ ده مسار المستخدم هيكون عامل ازاي و ايه المسارات الرئيسية و الفرعية عشان علي اساسها نبدأ نوزع قطع الاثاث اللي هنحتاجها في الفراغ ده
لازم نرفع مقاسات الفراغ اللي بنفرشه و نعرف نحدد فيه اماكن الابواب و الشبابيك الموجودة و ده عشان نقدر نحدد مسارات الحركة و الممرات الرئيسية
بعد كده نحدد هنفرش الفراغ ازاي و مقاسات كل قطعة اثاث هنحتاجها و كمان نحدد وحدات الاضاءة و الاكسسوارات, ده هيخلينا محددين في طريقة البحث بتاعنا و هيبقي سهل جدا نعمل عملية اختيار للانسب و استبعاد الغير مناسب, و الغير مناسب ممكن يبقي مش مناسب عشان المقاس او اللون او الستايل او الميزانية, و هنا بيبان اهمية الخطوات السابقة للخطوة دي
كده احنا بقينا عارفين احتياجتنا و الستايل اللي هنستخدمة في الفرش و الميزانية بتاعتنا و كمان كل قطعة اثاث او فرش او اضاءة بمقاساتها, و بكده بقينا جاهزين نختار من اللي معروض في السوق اللي هيناسب كل الاحتياجات دي و هنبدأ الخطوة الاهم عالاطلاق و هي
تحديد الاختيارات النهائية و التنفيذ
بعد ما بنكون حددنا كل الخطوات اللي فاتت بنبقي جاهزين اننا نبدأ عملية البحث عن قطع الاثاث اللي هنشتريها بناء علي تحديد الستايل و المقاسات و الوحدات اللي حددناها في المراحل السابقة
بنبدأ نشوف ايه الاماكن اللي هنشتري منها سواء محلات او اونلاين و نبدأ نحدد القطع اللي محتاجنها
استنوا لسه مش هنشتري دلوقتي – بنجمع صور لكل القطع اللي عجبتنا و نبدأ نحطهم مع بعض في صورة واحدة عشان نشوف شكلهم مناسب ولا لاء
و الخطوة دي من اهم الخطوات عشان نتاكد ان كل وحدات الفرش منسجمة مع بعض و في بنها تناسق و انسيابية, و اغلب اماكن الشراء هيبقي متاح فيها صور وحدات الاثاث و لو اونلاين بنحمل الصورة و نستخدمها عشان نتخيل بيها الشكل النهائي
الموضوع ممكن نعمله بموبيل ابلكيشن زي
بعد كده بستخدام اي ابلكيشن تاني زي
بندخل كل الصور اللي حددناها للاثاث و اللاكسسوارات و نشوف شكلهم مع بعض عشان يدونا تخيل اوضح و نعرف هيحققوا الستايل زي ما احنا تخيلنا ولا لاء
و طبعا في المرحلة دي ممكن لو محتارين ما بين كذا اختيار نجرب صور الوحدات اللي محتارين فيها و نشوف انهي هيبقي مناسب اكتر للستايل بتاعنا و للشكل العام للفراغ
اول ما نوصل لشكل نهائي للتصور و الشكل النهائي للاختيارات بتاعتنا تكون كملت, بنبقي جاهزين للاننا نشتري و نفرش بيتنا بالشكل اللي بنحبه
قولولنا لو المقال عجبكوا, حابين نكلمكوا عن ايه تاني بيشغلكوا في مجال الديكور و الاثاث و فرش البيت