كل حد مننا بيبقي نفسه يفرش بيته بالشكل اللي بيحبه و يناسب احتياجاته و كمان يطلع بشكل جميل و يعجب كل الناس, غير كمان اننا بنحب بيتنا يعكس شخصيتنا و ذوقنا و ده بيحصل فعلا و فرش بيتنا ديما بيقول عننا حاجات كتير, عشان كدة فرش البيت عملية صعبة شوية و فيها تحديات من أول تنوع الاختيارات و الخامات و الالوان و القماش و الاسعار, لحد المقاسات و الاشكال
و ده طبعا بيظهر اكتر لو عندك ستايل معين عايزة تحققيه في بيتك و توصلي بيه لموود معين بتحبيه و بترتاحي فيه, و أكبر تحدي بيواجهك أكيد بيكون تحديد الميزانية الانسب و التوازن بينها و بين الخامات و الشكل
أيه أهم حاجات محتاجة تحدديها في أختيارك للكنبة الانسب ليكي؟
لان الكنبة من أهم وحدات الفرش اللي بتكون في أي بيت و اللي بنستخدمها و بنلاقيها في اي فراغ للجلوس سواء للضيوف او لاهل البيت, ده بيخلي عملية الاختيار تاخد وقت و مجهود لتحديد الكنبة الافضل ليكي, كمان نوع الاستخدام هو اللي بيحدد طريقة إختيارك ليها, يعني لو كنبة لاستقبال الضيوف بيكون ليها مواصفات و ستايل غير لو كنبة لاستخدام أهل البيت أو حتي كنبة أوضة النوم
كمان بيكون في عوامل تانية محددة للقرار مش بس الشكل – رغم ناس كتير بتشوف ده أهم عامل إلا ان العوامل التانية ممكن تأثر عليه – و أهمها هل هتناسب ديكور بيتك و الفراغ اللي هتكون فيه؟ هل هتبقي عملية في الاستخدام؟ هل هتكون سهلة في التنضيف و الحركة؟ أيه هو المقاس المناسب ليها؟
عشان تختاري الكنبة الافضل ليكي لازم تفكري كويس انت محتاجة الكنبة دي ليه؟ وأيه أنسب ستايل بتحبيه و بيريحك في الكنب؟ عايزة شكل كلاسيك يعيش معاكي وقت طويل و يقاوم تغير الذوق؟ و لا بتحبي الستايل المودرن المريح و العملي؟ عايزة شكل الكنبة يكمل شكل ديكور البيت في إنسيابية؟ و لا عايزة الكنبة يكون ليها شخصية تخطف العين و تبقي هي البطل الحقيقي للمكان؟ عايزة فيها حلول عملية و تبقي متعددة الاستخدام؟ عيزاها تكون مرفوعة عن الارض و تبقي بتتنظف اسهل و تكون سهله في الحركة؟ و لا عايزة فيها مساحة تخزين ؟
أول ما تعرفي كل أحتياجاتك و تجاوبي الاسئلة اللي هتحدد انت محتاجة تستخدمي الكنبة إزاي يبقي ده وقت المرحلة التانية و هي مهمة جدا و هي مرحلة البحث و التقييم للوصول للكنبة الافضل ليكي. أول حاجة أعملي بحث في كل مواقع بيع الاثاث اونلاين و كل الصفح المتعلقة ببيع او تصنيع الاثاث علي مواقع التواصل الاجتماعي, ده عشان تشوفي كل المتاح في السوق و تعرفي ايه الستايلات الموجودة دلوقتي و الاسعار عاملة ازاي, و هل الانت محتاجاه في الكنبة بتاعتك هتلاقيه في موديل واحد ولا هتحتاجي تتنازلي عن حاجات؟! كمان عشان هتقدري تشوفي اراء ناس تانية في الموديلات اللي عجبتك و تقدري تحددي مزايا و عيوب كل كنبة شفتيها من تقييمات المستخدمين التانين
استبعدي كل الموديلات اللي فيها تقييمات سلبية كتير او سعرها بعيد عن الميزانية الانت محدداها. بعد كده انزلي اتفرجي في محلات الاثاث المتاحة حوليكي, جربي الكنب بنفسك أقعدي عليه و حسي استخدامك ليه مريح ولا لاء؟ فيه احتياجاتك و لا لاء؟ عشان كمان تحسي الفرق في الشكل و الحجم و الملمس و سهولة الاستخدام و الحركة. و في أي مكان تزوريه و يعجبك فيه كنبة اسئلي عن خاماتها و سعرها و إمكانية التعديل فيها, سواء في القماش او في لون الخشب و الاهم تعديل المقاسات. و أهم سؤال متنسيش تسئليه هو مدة الضمان علي الكنبة, لان هو ده عامل المقارنة الحقيقي اللي تعتمدي عليه في إختيارك بين مكان و التاني
بعد كل ده جه وقت الاختيار النهائي, في وقت تكوني مرتاحة فيه طلعي قائمة الكنب المفضل بالنسبالك اللي حددتيها من بحثك, حددي فيها كل الاختيارات اللي شفتيها انسب ليكي و لاحتياجاتك و قارني بينهم و متعتمديش في المقارنة علي السعر, بالعكس ركزي ديما انك تقارني مدة الضمان بين كنبة و التانية, محدش بيغير الكنبة بتاعته كل 6 شهور و لا حتي كل سنتين و استبعدي اي مكان بيضمن المنتج بتاعه اقل من خمس سنين و الضمان لازم يكون علي كل حاجة خشب و تنجيد و قماش, ممكن بس لو في الكنبة ميكانزم فا ده مدة ضمانه بتختلف حسب مكان التصنيع و ده مابيكونش ليه علاقة بمصنع الاثاث نفسه لانه بيشتري الميكانزم من شركات تانية
عشان تعرفي تحددي الكنبة الارخص فعلا أقسمي سعر الكنبة علي عدد سنين الضمان, ساعتها هتعرفي تحددي مين الارخص بجد و تكلفتها الحقيقية عليكي في السنة الواحدة كام و هتتفاجئي انك هتلاقي ان لو كنبة سعرها 20 الف جنية بضمان 10 سنين في الحقيقة هي ارخص من كنبة سعرها 6 الاف جنية بضمان سنتين بس, الاولي تكلفتها في السنة 2000 جنية انما التانية تكلفتها في السنة 3000 جنية, يعني الكنبة اللي هتعيش اكتر هتوفر عليكي مش بس فلوس انما مجهود و وقت بيضيع في البحث و التدوير. ماتنسيش كمان اهم عامل في الاختيار و هو إمكانية تغيير اللون و القماش و المقاسات عشان تشتري كنبة تناسبك أنت و تناسب إحتياجاتك أنت و مساحة بيتك أنت و تبقي علي ذوقك أنت
أيه أكتر ستايل ممكن يناسب بيتك؟
لان الكنبة من أهم أساسيات فرش البيت و تقريبا مفيش بيت مفهوش كنبة بيكون أختيار الكنبة شئ صعب شوية لكن مجرد ما بتلاقي الكنبة المناسبة ليكي هتحبي شكل البيت و ترتاحي فيه
كل الستيلات الخاصة بالفرش عموما بترجع للتقسيمة الاشهر في الستايلات و هو ستايل كلاسيك او ستايل مودرن و ساعات بنسميها بشكل تاني زي ستايل تقليدي و ستايل معاصر, و كل ستايل بيكون له استخدامه بما يتناسب مع ديكور بيتك و ذوقك اللي بتحبيه
بتختاري الستايل الكلاسيك لما تحبي تفرشي بيتك بشكل يتخطي حدود الزمن و الموضة و يفضل محافظ علي شكله وموضته ماتروحش مهما عدي عليه سنين, و كمان يفضل بنفس حالته الانيقة لاطول فترة ممكنة من غير ما تحتاجي تجدديه او تغيري الوانه, ده غير انه بيدي قيمة عالية للمكان و بيحتفظ بقيمته المادية و ممكن يتباع تاني بسعر كويس, يعني زي ما بيقولوا الستايل الكلاسيك الاصلي في الفرش بيكون فيه استثمار
الاستايل المودرن بتختاريه لما تكوني عايزة تفرشي البيت بشكل عصري و علي الموضة و يكون فيه تنوع في الاستخدام لنفس قطعة الاثاث, و كمان تنظيفة سهل و حركته سهله, ده غير ان سعره بيكون اقل مقارنة بالكلاسيك فا تقدري تغيريه كل فترة قصيرة لو انت بتحبي تغيري فرش بيتك كل فترة من غير ما يكون في خسارة في قيمته. كمان الستايل المودرن من مميزاته تعدد استخدام قطعة الاثاث و اللي بتخلي عندك حل مناسب لاستغلال المساحات الصغيرة
إقتراحات لكنب متعدد الاستخدام
لان كل بيت له شخصية مختلفة بيكتسبها من خلال فراغاته المعمارية و تعرضه للاضاءة الطبيعية, و لان كل شخص مننا في بيته بيكون له روتين خاص به و بينعكس علي إستخدامه لفرش بيته, ده غير إن الحياة العملية دلوقتي بتخلينا دايما محتاجين مرونة عالية في التغيير في بتنا, زي ما حصل أيام كورونا و كل حد فينا إحتاج ركن في بيته عشان يشتغل منه, هنقلك افكار مختلفة للكنب متعدد الاستخدام إلي يخليكي تعرفي تغيري في شكله و إستخدامه بالشكل اللي يناسب إحتياجاتك و إحتياجات أسرتك
1. كنب منفصل بوحدات مستقلة
النوع ده من الكنب بيكون سهل تغيير شكله وممكن يتفرش بكذا طريقة, يعني ممكن القطع تتحط جمب بعضها فتكون كنبة كبيرة يقعد عليها عدد كبير من الضيوف و ممكن تتحط علي شكل زاوية فتكون كنبة ركن و يبقي في استخدامها راحة اكبر للاستلقاء او النوم لضيف مفاجئ
كمان ممكن تتقسم لكنبتين قصاد بعض او في ظهر بعض او حتي كنبة و كرسي
كل الاختيارات مفتوحة ليكي عشان تحركيها بالشكل اللي يناسب احتياجك و تفرشيها زي ما انت عايزة, كمان الميزة دي بتكون مريحة جدا و عملية للاشخاص اللي بتزهق بسرعة و كل شوية عايزة تغير من فرش بيتها و شكله
2. كنبة فيها مساحات تخزين
الكنبة اللي فيها مساحات تخزين بتساعدك اكتر علي تنظيم و ترتيب البيت, و لو عندك أطفال فالكنبة بمساحة تخزين في اوضة الاطفال او في غرفة المعيشة هتكون حل ممتاز عشان يشيلوا فيها لعبهم و الوانهم بعد ما يخلصوا لعب و يساعدوكي علي ترتيب البيت بسهولة و ترجع الاوضة مرتبة و جميلة
3. كنبة و مكتب في وحدة واحدة
الاثاث المتعدد الاستخدام بقي من الحلول الاساسية لاستغلال المساحات و لو عندك الحاجة للشغل من البيت او طفل محتاج يذاكر بتركيز في اوضته يبقي الكنبة بظهر مكتب حل مناسب ليكي
كمان ممكن تبقي 3 في 1 يعني كنبة و مكتب و سرير في نفس الوقت و ده بيكون ميكانيزم سهل الاستخدام, وقت الشغل او المذاكرة تكون الجلسة مقفولة و المكتب مفتوح و بينزل لتحت عشان نفتح الكنبة وقت الراحة او الاسترخاء, و لو غيرتي في عمق الكنبة و عرضها ممكن تبقي سرير و ده بيكون عملي جدا في غرف الاطفال عشان يكون فيها مساحة كبيرة لللعب و التنطيط بدل ما السرير بيكون واخد مساحة كبيرة من الاوضة و مش بيستخدموه غير وقت النوم
4. الكنبة السرير
من الاثاث المتعدد الاستخدام و مشهور جدا و ليه اشكال مختلفة و بيفتح بطرق مختلفة عشان يكون سرير و كمان فيها موديلات مختلفة في شكل الكنبة
أهم حاجة محتاجة تتاكدي منها في اختيارك و انت بتشتري الكنبة السرير أن فتح و قفل السرير يكون سهل جدا و مش محتاج مجهود عشان ميبقاش مرهق بعد كده و يخليكي تكسلي تستخدميها و تضيع عليكي أهم ميزة فيها
5. الكنبة الشيزلونج
و دي من أريح انواع الكنب في الاستخدام و الاشهر في فرش غرف المعيشة, و ده عشان هي فيها امكانية تعديل مسند الرجل بالاخص و كمان ممكن يبقي فيها تعديل مسند الرأس و مسند الايد, ميزتها في ميكانزم فتح مسند الرجل اللي بيدي مستوي اعلي من الاسترخاء و الراحة للارجل و الجسم كله, كأنك قاعده علي شيزلونج و ميزتها ان بيكون فيها اشكال كتير متنوعة و ممكن يبقي فيها تعديل مسند الرجل بس و ده بيخلي شكل الظهر فيه تنوع عشان يناسب اي ذوق
و دي كانت أهم النصايح اللي تخليكي تعرفي تشتري كنبة و أنت متأكده ان اختيارك هو الانسب ليكي
قولولنا حابين نكتبلكوا عن ايه تاني مهم لفرش البيت و بيحيركوا و انتوا بتاخدوا قرار شراء وحدات أثاث للبيت